Zëdhënësi i Kremlinit, Dmitry Peskov, ka deklaruar se nuk kanë marrë letër nga Juan Guaido i cili u vetëshpall si president i përkohshëm i Venezuelës, transmeton Anadolu Agency (AA).

Peskov në një deklaratë për gazetarët në Moskë duke komentuar deklaratat e bëra se Guaido i ka dërguar letër Rusisë dhe Kinës duke kërkuar mbështetjen e tyre, tha se “Nuk kemi marrë një letër të tillë. Nëse e marrim një letër të tillë do ta shqyrtojmë. Por, ne nuk e njohim Guaidon si president. Partneri i Rusisë në Venezuelë është Nicolas Maduro dhe qeveria e tij”.

Pasi bëri të ditur se Rusia nuk ka ndonjë lidhje me shitjen e arit të Venezuelës, Peskov theksoi se “Në lidhje me këtë çështje nuk kemi informacion. Por, nëse Venezuela dëshiron të shesë ar kjo është një e drejtë sovrane e saj”.

“Në çdo rast, ne shpresojmë që marrëdhëniet tona tregtare dhe ekonomike dhe bashkëpunimi i ndërsjellë do të vazhdojnë, pavarësisht nga situata politike në këtë vend”, tha Peskov duke njoftuar më tej se do të vazhdojnë marrëdhëniet me këtë vend pavarësisht zhvillimeve politike në Venezuelë.