Kryeministri maqedonas Nikolla Gruevski gjatë vizitës së sotme në rajonin e Shkupit ka shprehur dëshirë të vizitojë familjen e Isamedin Osmanit, policit shqiptar të vrarë në aksionin në Kumanovë, porse familja e tij ka refuzuar ta takojë, shkruan portali maqedonas Libertas.

Isamedin Osmani është një nga 8 pjesëtarët e policisë maqedonase të vrarë në konfliktin me grupin e armatosur shqiptar më 9 maj në Kumanovë. Kabineti i Gruevskit ka planifikuar që gjatë vizitës fshatit Studeniçan të vizitojë edhe familjen e Osmanit, porse ajo ka refuzuar të pranojë ngushëllimet e tij, thonë burime të portalit.

Lidhur me vizitën e sotme të Gruevskit, në facebook komentoi kryeredaktori i Alsat-it, Muhamed Zekiri, sipas të cilit kjo vizitë nga shërbimet është vlerësuar si e rrezikshme për sigurinë e kryeministrit, kështu që sigurimi i tij është përforcuar me snajperë.

“Gruevskin në Studeniçan e kanë ruajtur snajperistë. E ka pritur kryetari Azem Sadiki, ndërsa ka vizituar edhe fshatrat Moranë dhe Koliçan i Poshtëm, ka shrkuar Zekiri.