E ardhmja e Julián Álvarez vazhdon të jetë një nga temat më të nxehta të merkatos verore. Sulmuesi argjentinas i Atlético Madrid po lidhet vazhdimisht me një largim të mundshëm, ndërsa situata duket se po bëhet gjithnjë e më e ndërlikuar.

Klubi madrilen vazhdon të mbajë një qëndrim të prerë, duke iu referuar kontratës së lojtarit, e cila është e vlefshme deri në vitin 2030, si dhe klauzolës së lirimit prej 500 milionë eurosh. Megjithatë, spekulimet për largimin e tij nuk kanë pushuar.

Sipas gazetarit argjentinas Gastón Edul, i cili konsiderohet i afërt me rrethin e lojtarit, gjasat që Álvarez të vazhdojë te Atlético sezonin e ardhshëm janë shumë të vogla.

“Më duket shumë e vështirë ta shoh Julián Álvarezin duke luajtur për Atlético Madridin sezonin e ardhshëm. Kjo do të jetë një negociatë e gjatë dhe shumë komplekse. Nuk është një çështje që do të zgjidhet lehtë”, deklaroi Edul.

Ai zbuloi gjithashtu se dy klube tashmë kanë bërë oferta për sulmuesin argjentinas, por të dyja janë refuzuar nga Atlético.

“Ka dy klube që kanë bërë oferta për Juliánin dhe të dyja janë refuzuar. Njëri është Barcelona, megjithëse kjo është mohuar nga Atlético, ndërsa tjetri është Paris Saint-Germain”, tha gazetari.

Sipas tij, brenda rrethit të lojtarit, Barcelona shihet si destinacioni i preferuar, madje edhe nëse ofertat e klubit katalanas janë më të ulëta se ato të Paris Saint-Germain.

Nga ana tjetër, Atlético Madridi nuk ka ndërmend të lehtësojë largimin e yllit të tij. Sipas Edulit, klubi spanjoll dëshiron të mbrojë investimin e bërë dhe nuk është i gatshëm të negociojë për një shumë më të ulët se rreth 150 milionë euro.

“Atlético po mbron interesat e veta dhe kjo është krejtësisht normale. Ata do ta mbajnë këtë qëndrim për aq kohë sa të jetë e nevojshme për të siguruar shumën më të lartë të mundshme nga një transferim i mundshëm”, shtoi ai.

Megjithatë, gazetari beson se drejtuesit e klubit janë të vetëdijshëm se mbajtja e Álvarezit do të jetë shumë e vështirë.

“Mendoj se brenda klubit e dinë se është shumë e vështirë që Julián të vazhdojë te Atlético sezonin e ardhshëm. Kjo situatë mund të zgjasë gjatë gjithë verës, madje edhe gjatë Kupës së Botës”, përfundoi Edul.

Nëse këto parashikime rezultojnë të sakta, saga e Julián Álvarezit pritet të jetë një nga transferimet më të përfolura të kësaj vere./Arbresh.info