Në Gjermani po qarkullojnë zëra për një rikthim të mundshëm të Xabi Alonsos në Bundesliga, kësaj here në stolin e Eintracht Frankfurtit, i cili ka mbetur vakant pas shkarkimit të Dino Toppmöller këtë të diel.

Sipas asaj që raporton Bild, klubi gjerman e vlerëson trajnerin spanjoll si një opsion, ndërsa drejtori sportiv Markus Krösche po shtyn për një takim me të për të eksploruar mundësinë e një angazhimi të ri.

Ky lajm vjen vetëm pak ditë pasi tekniku nga Tolosa u shkarkua nga posti i trajnerit të Real Madridit.

Largimi i Toppmöller u zyrtarizua pas barazimit 3-3 ndaj Werder Bremenit dhe një serie rezultatesh zhgënjyese. Me 39 gola të pësuar në 18 javë, Eintracht Frankfurti, aktualisht i shtati në renditje, ka një nga mbrojtjet më të dobëta në Bundesliga, çka u bë arsyeja kryesore që drejtuesit të vendosnin për ndryshim kursi.

Gjithmonë sipas Bild, klubi po shqyrton edhe alternativa të tjera si Edin Terzic, Marco Rose apo Roger Schmidt. Megjithatë, objektivi kryesor në Deutsche Bank Park mbetet bindja e Xabi Alonsos për të bërë gati valixhet dhe për t’u rikthyer në Gjermani.

Pavarësisht interesimit, një rikthim i spanjollit në stolin e një klubi të Bundesligës duket pak i mundshëm.

Pas suksesit të madh me Bayer Leverkusenin, Xabi Alonso ishte në orbitën e gjigantëve si Bayern Munich dhe Liverpool, përpara se të firmoste me Real Madridin.

Një kalim te Eintracht Frankfurti, përveç kostos së lartë financiare për klubin, do të përfaqësonte edhe një hap prapa në karrierën e trajnerit spanjoll.

Prandaj, gjithçka tregon se ai do të preferojë të mos nxitojë dhe të presë një mundësi në një projekt tjetër të madh evropian, ndonëse Eintracht do të përpiqet të luajë kartat e veta./Arbresh.info