Deputetja e Lëvizja Vetëvendosje, Shqipe Selimi, gjatë seancës solemne për Epopeja e UÇK-së, theksoi se Prekazi dhe familja Jashari i dhanë leksion botës mbi çmimin e lirisë dhe vlerën e sakrificës.

Gjatë fjalës së saj para deputetëve, Selimi nënvizoi se lufta çlirimtare e Kosovës duhet të mbrohet si vlerë, sidomos kur sulmohet pastërtia e saj.

“Në historinë tonë të lavdishme, 5 marsi dhe Epopeja e UÇK-së janë pikëtakimi ynë ku bashkohemi dhe reflektojmë mbi unitetin dhe vetëdijen kombëtare. Kjo datë mbledh njerëzit e mirë dhe patriotë, pa dallime. Shembulli i sakrificës dhe heroizmit të Adem Jashari, i familjes Jashari dhe i luftëtarëve të UÇK-së, na bën të jemi të vetëdijshëm se sa i shtrenjtë është atdheu dhe si duhet t’i dalim zot çdoherë kur ka nevojë për ne. Prekazi dhe Jasharët i dhanë leksion botës se sa e shtrenjtë është liria dhe sa e madhe është sakrifica për të. Familja Jashari është shembull për të gjithë njerëzimin”, tha Selimi.

Selimi shtoi se kujtimi për dëshmorët e mban të freskët dhe e bën popullin të paluhatur në rrugën e drejtë për të ecur përpara. “5, 6 dhe 7 marsi nuk i takojnë vetëm të kaluarës sonë. Epopeja e UÇK-së është edhe e sotmja, që na rrëfen të ardhmen tonë të dinjitetshme. Lufta e lavdishme çlirimtare ka nevojë të mbrohet si vlerë, sidomos kur sulmohet pastërtia e saj, kur sulmohet lufta e drejtë dhe rrjedhjet e saj, edhe kur tentohet të rishkruhet historia jonë e lavdishme”, tha ajo.

Në fund, deputetja pati edhe një mesazh për ata që tentojnë të rishkruajnë historinë e UÇK-së nëpër salla gjyqi, aty ku po gjykohen ish-krerët e Ushtrisë Çlirimtare të Kosovës.

“Kushdo që tenton ta rishkruajë historinë e UÇK-së dhe të Adem Jasharit, përgjigja jonë është e qartë: ne të gjithë jemi UÇK, ne të gjithë jemi Jasharët”, përfundoi Selimi.