Vitinha po vazhdon të konfirmohet si një nga figurat kryesore të futbollit evropian.

Mesfushori i Paris Saint-Germain u shpall mesfushori më i mirë i vitit 2025 në ceremoninë e Globe Soccer Awards, të mbajtur në Dubai, duke kurorëzuar një sezon pothuajse perfekt.

Nën drejtimin e Luis Enrique, PSG dominoi në mënyrë mbresëlënëse, me Vitinhën si një nga shtyllat kryesore të skuadrës, ndërsa kulmi i suksesit erdhi me fitimin e Ligës së Kampionëve.

Në një intervistë për Marca, 25-vjeçari portugez foli edhe për idhujt që kanë ndikuar më së shumti në formimin e tij si futbollist.

“Pa asnjë dyshim, lojtari që më ka frymëzuar më shumë është Iniesta. Andrés ka qenë gjithmonë modeli im më i madh. Pastaj vjen Luka Modrić, sigurisht. Këta të dy kanë qenë referencat e mia kryesore”, u shpreh Vitinha.

Një lidhje e qartë me dy legjenda të mesfushës, nga dy rivalët më të mëdhenj spanjollë, që shpjegon stilin elegant dhe inteligjent të lojës së Vitinhës, tashmë të konsoliduar në elitën botërore.