Boksieri i njohur britanik Anthony Joshua ka shpëtuar për mrekulli nga një aksident i rëndë automobilistik në Nigeri, ku fatkeqësisht dy persona kanë humbur jetën.

36-vjeçari u nxor i gjallë nga automjeti dhe ka pësuar vetëm lëndime të lehta, ndërsa aktualisht po merr trajtim mjekësor në spital. Aksidenti ndodhi rreth orës 11:00 sipas kohës lokale (10:00 GMT), në autostradën e frekuentuar Lagos–Ibadan, në zonën Makun.

Joshua ishte një nga pesë personat e përfshirë në përplasjen e rëndë, kur makina tip Lexus Jeep, në të cilën ai ndodhej në sediljen e pasme, u përplas me një kamion të ndalur pranë një pike karburanti. Eskorta e tij e sigurisë po udhëtonte në një automjet tjetër.

Sipas autoriteteve lokale, automjeti dyshohet se po lëvizte mbi kufirin e lejuar të shpejtësisë dhe humbi kontrollin gjatë një manovre parakalimi.

Vetëm pak orë para aksidentit, Joshua kishte publikuar një video në Instagram, ku shihej duke luajtur pingpong dhe duke buzëqeshur, në shoqërinë e mikut të tij të ngushtë dhe trajnerit personal. Videoja u postua rreth një orë e gjysmë para ngjarjes dhe i dha ndjekësve përshtypjen se boksieri ishte në gjendje të shkëlqyer shpirtërore.

Pamjet nga vendngjarja tregojnë Joshuan të tronditur dhe në dhimbje, ndërsa autoritetet po vazhdojnë hetimet për zbardhjen e plotë të rrethanave të aksidentit.

Anthony Joshua, ish-kampion bote në peshat e rënda, ka origjinë nigeriane nga të dy prindërit./Arbresh.info