Anthony Joshua dhe Andy Ruiz Jr të shtunën zhvillojnë rimeçin e tyre në Arabinë Saudite të vlefshëm për titujt e botës në kategorinë e peshave të rënda, WBA, WBO dhe IBF.

Pas befasisë së madhe që e bëri meksikano-amerikani në duelin e parë më qershor, britaniku do të përpiqet t’i kthejë titujt e tij më 7 dhjetor në Diriyah.

Rivali më i madh i Joshuas, Deontay Wilder ka dhënë parashikimin e tij lidhur me duelin e shumëpritur.

“Vërtet besoj se Andy do të dalë aty dhe do të fitojë sërish. Kur e shikoj meçin e parë dhe i analizoj disa gjëra të caktuara si boksier, ka shumë pika të kuqe që më alarmojnë. Dhe nëse ndodhe njëjta qasje dhe momente të ngjashme edhe në duelin e dytë, Andy Ruiz do ta fitojë me lehtësi”.

“Ai (Joshua) u rrëzua katër herë dhe pastaj u dorëzua. Kjo është gjë e madhe, sipas meje. Duke e shikuar nga jashtë, duke parë si shkonte meçi dhe gjithçka tjetër, mendoj se ai (Joshua) do të luftojë me demonët e tij brenda ringut, jo vetëm me Ruizin”.

“E di se po përpiqet t’i ndërpresë shumë gjëra në mendjen e tij, në veçanti, duke më përfshirë edhe mua, rivalin e tij më të madh dhe më kryesorin”, citon talkSPORT fjalët e Wilder. /Telegrafi/