Barcelona arriti një fitore të rëndësishme 3-1 ndaj Alavesit në fundjavë, rezultat i cili i lejon katalanasit të mbajnë vendin e parë në renditje, pas barazimit të Real Madridit 1-1 në udhëtim tek Gironës.

Megjithatë, pas përfundimit të sfidës, në bankën rezervë të Barcelonës u vu re një moment emocional. Trajneri Hansi Flick u pa i prekur, ndërsa pranë tij qëndronte Raphinha.

Në konferencën për shtyp para ndeshjes së radhës ndaj Atletico Madridit, Flick zbuloi arsyen që e çoi drejt emocionimit.

Trajneri gjerman bëri të ditur se përjashtimi i dy anëtarëve të stafit teknik në fund të ndeshjes — mes tyre edhe Marcus Sorg, zëvendëstrajner i tij ka qenë arsyeja kryesore e reagimit të tij.

“Isha i zhgënjyer sepse humbëm shumë topa gjatë lojës, por mbi të gjitha sepse dy anëtarë të stafit u përjashtuan në fund të ndeshjes. Marcus Sorg është një mik i imi dhe nuk preferova të thosha asgjë në atë moment për shkak të nxehtësisë së situatës,” deklaroi Flick.

Ai shtoi se fillimisht kishte menduar të shkonte në dhomën e zhveshjes për të diskutuar situatën, por më pas vendosi të qëndronte jashtë për t’u qetësuar.

“Qëndrova aty derisa e mora veten. Jam shumë i lumtur që jam këtu. Është normale që ndonjëherë të ndodhin edhe situata të tilla,” përfundoi trajneri i Barcelonës./Arbresh.info