Jude Bellingham po kalon një nga periudhat më të vështira që prej transferimit te Real Madrid. Mesfushori anglez nuk po arrin të rikthejë formën shpërthyese që e karakterizoi në sezonin e tij të parë në Madrid, ndërsa para Botërorit 2026 pikëpyetjet rreth rolit të tij po shtohen çdo ditë.

Edhe pse tashmë ka lënë pas problemet fizike që e penguan për një kohë të gjatë, statistikat e tij nuk kanë treguar asnjë përmirësim. Në vitin 2026, Bellingham ka realizuar vetëm dy gola dhe një asistim me fanellën e madrilenëve, shifra shumë larg pritshmërive për një prej yjeve më të mëdhenj të ekipit.

Në La Liga, rënia e tij bëhet edhe më evidente kur krahasohet me dyshen Kylian Mbappé dhe Vinícius Júnior. Edhe pse të dy kanë kaluar periudha me ulje-ngritje gjatë sezonit, Bellingham ka mbetur dukshëm prapa. Ai ka shënuar vetëm pesë gola në 37 ndeshje kampionale.

Madje, edhe sezoni i kaluar konsiderohej më i mirë për anglezin. Në edicionin 2024/25 ai realizoi nëntë gola në kampionat, ndërsa në sezonin debutues kishte shpërthyer me plot 19 gola, duke u kthyer menjëherë në lider të skuadrës madrilene.

Situata nuk është më e mirë as me kombëtaren e Anglisë. Marrëdhënia e tij me trajnerin Thomas Tuchel është raportuar e tensionuar, ndërsa Bellingham ka pasur shumë pak hapësira me “Tre Luanët”. Në 12 muajt e fundit ai ka luajtur vetëm 128 minuta me Anglinë dhe ka qenë titullar vetëm një herë.

Kjo e vendos seriozisht në dyshim praninë e tij në formacionin startues të Anglisë për Kupën e Botës 2026. Sfida e parë e anglezëve nuk do të jetë aspak e lehtë, pasi më 17 qershor do të përballen me Kroacia e udhëhequr nga Luka Modrić. Në grupin L bëjnë pjesë edhe Ghana dhe Panamaja.

Forma dhe gjendja e Bellingham në prag të këtij turneu mbetet një nga shqetësimet më të mëdha për Anglinë, e cila synon më në fund triumfin botëror./Arbresh.info