Presidenti i Republikës së Shqipërisë, Bajram Begaj, ka reaguar pas ngjarjes tragjike në Maliq, duke shprehur dhimbjen dhe solidaritetin e lartë shtetëror për humbjen e jetës së efektivit Enea Mekolli dhe plagosjen e kolegut të tij, Edison Adri.

Kreu i Shtetit nënvizoi se kjo humbje nuk do ta zbrapsë Policinë e Shtetit, duke garantuar se populli shqiptar është masivisht në krah të uniformave blu për mbrojtjen e rendit dhe sigurisë publike.

“Bashkohem thellësisht më dhembjen për humbjen tragjike të jetës në krye të detyrës të policit Enea Mekolli dhe plagosjen rëndë të kolegut të tij, Edison Adri.

I shpreh familjes ngushëllimet dhe solidaritetin më të lartë në emër të shtetit shqiptar në këtë ditë mjaft të rëndë për ta!

I uroj shërim të plotë dhe sa më të shpejtë punonjësit të Policisë së Shtetit, i cili mbeti i plagosur!

Policia e Shtetit nuk do të zbrapset nga kjo humbje e do ta kthejë dhimbjen në forcë e vendosmëri për të luftuar krimin në çdo skutë.

Populli shqiptar është masivisht përkrah policisë në mbrojtje të sigurisë dhe rendit publik”, tha Begaj.