Prej ditësh tashmë në kufijtë e Shqipërisë, e veçanërisht ato me Greqinë, një sërë shqiptarësh mbesin të bllokuar pasi pala shqiptare nuk I lejon të kalojnë në vendin tonë.

Edhe këtë të dielë në kufirin e Kapshticës janë bllokuar rreth 60 shqiptarë në kufirin e gjelbër. Mbi rastin në fjalë ka reaguar Presidenti Meta, i cili ka kërkuar nga institucionet përgjegjëse gjetjen e një zgjidhje të menjëhershme

Postimi i plotë:

Jam shumë i shqetësuar mbi situatën e qytetarëve shqiptarë të cilët vijojnë ende të bllokuar në pikat e kalimit kufitar të Kakavijës dhe Kapshticës.

Kjo situatë duhet të marrë zgjidhje të menjëhershme.

U bëj thirrje sërish të gjithë qytetarëve shqiptarë të respektojnë kushtet e urgjencës dhe domosdoshmërisë të imponuara nga pandemia e COVID-19 në pikat tona kufitare e njëkohësisht kërkoj nga autoritetet tona përgjegjëse të respektojnë, jo vetëm kërkesat e situatës së gjendjes së fatkeqësisë natyrore, por edhe detyrimet kushtetuese dhe ndërkombëtare që shteti ka ndaj qytetarëve të vet në një situatë të tillë.

Edhe njëherë kërkoj nga të gjithë më shumë bashkëpunim e mirëkuptim, solidaritet e përgjegjësi mes qytetarëve dhe autoriteteve tona në dobi të interesit publik dhe sigurisë së jetës.