Porti i Vlorës ka shënuar sot një ditë rekord, duke arritur nivele të larta të fluksit të pasagjerëve dhe automjeteve që mbërritën nga linjat detare, duke e bërë këtë ditë më të ngarkuar për këtë sezon turistik.

Në mëngjes, porti priti 1,019 pasagjerë dhe 48 anëtarë ekuipazhi, që erdhën me një numër të konsiderueshëm automjetesh: 267 makina, 2 kampingë, 2 minibusë, 1 autobus dhe 4 motoçikleta. Këto shifra e shpallin këtë ditë si më të ngarkuarën për këtë verë.

Fluksi i udhëtarëve pritet të vazhdojë edhe në orët e pasdites, me mbërritjen e një trageti tjetër, i cili do të dyfishojë numrin e pasagjerëve dhe automjeteve që hyjnë në vend përmes këtij porti strategjik.

Ky volum i madh mbërritjesh tregon rritjen e interesit për Vlorën si destinacion turistik dhe rëndësinë e saj si një nga portet kryesore të vendit në lidhjet me Italinë dhe rajonin./euronews.al