Presidenti Ilir Meta thotë se pas protestave popullore në Kirgistan, Komisioni Shtetëror i Zgjedhjeve mori vendimin për anulimin e zgjedhjeve parlamentare të zhvilluara së fundi në Kirgistan dhe vendosi përsëritjen e tyre në një kohë të afërt.

“Me këtë rast, dëshiroj të përshëndes popullin kirgiz për guximin e treguar në denoncimin e parregullsive masive, veçanërisht atë të blerjes së votave nga forca pranë pushtetit, si dhe në përballjen me cenimin e rëndë që ju bënë lirive e të drejtave themelore të tij, duke i mohuar të drejtën për zgjedhje të lira e demokratike”, shkruan Meta.

Ai thotë se qytetarët e Kirgistanit, si qytetarët e të gjitha vendeve të hapësirës së OSBE-së, meritojnë zgjedhje të lira e demokratike.

Ky mesazh i kreut të shtetit vjen në një kohë kur Meta i ka ashpërsuar tonet ndaj Kryeministrit Edi Rama, të cilin e ka paralajmëruar se do e ketë në çdo shesh të Shqipërisë në rast se prek të drejtën për zgjedhje të lira.