Policia Rrugore ka bërë një panoramë të akseve ku trafiku vijon ende të jetë problematik.

Përmes një njoftimi, policia njofton se prej orës 17:00 trafiku në aksin Gjiri i Lalzit- Tiranë është rënduar ndjeshëm. Në këto kushte, policia i ka bërë thirrje qytetarëve që të respektojnë rregullat e qarkullimit dhe të evitojnë parakalimet e gabuara.

Një tjetër aks që paraqet trafik mjaft të rënduar është ai në Fier- Levan Trafik të rënduar kanë dhe akset rrugore si Shkodër-Velipojë dhe Lezhë-Shëngjin.

“Ka shumë lëvizje e ngarkesë tek Gjiri Lalzit. Po ashtu ka ngarkesë të kontrolluar në hyrje në Tiranë. Në Lezhë, Shkodër e Velipojë ka ngarkesë, por që po monitorohet nga Policia Rrugore”, njofton policia.

E gjithë dita e sotme ka qenë në të tillë situatë për shkak se qytetarët janë dyndur drejt plazheve të vendit, sidomos në qytetin e Durrësit./Gazeta Express