Dy dëshmitarët e drejtësisë, Elvis Kaça dhe Klodian Selimi, janë tërhequr nga bashkëpunimi dhe kanë skenarin e rrëfyer prej tyre për Lazaratin se si 11 të rinj, më i vogli i tyre 16 vjeç, u organizuan kundër policisë duke vrarë efektivin Ibrahim Basha.

Dalja nga bashkëpunimi u konfirmua gjatë gjykimit që ka nisur nga fillimi, edhe pse prokuroria kërkoi tre burgime të përjetshme dhe 117 vjet heqje lirie në total.

Të dy dëshmitarët kanë pohuar se i kishin dhënë dëshmitë nga dhuna duke treguar edhe emrat e shokëve. Por megjithë këtë fakt, 10 nga të pandehurit insistuan sërish gjykimin e shkurtuar.

I vetmi që këmbëngul në gjykim të zakonshëm është Elvis Boçia, i cili pretendon se nuk ka qenë në vendngjarje, pasi siç thotë, në çastet kur u organizua sulmi i armatosur ndaj policisë, ai ndodhej në banesë duke dëgjuar këngët e Stresit.

Elvis Boçia ishte shkaku i kthimit të gjykimit atëherë kur dosja ishte pak hapa larg dhënies së drejtësisë. Avokati fillimisht kërkoi të thirrej për të dëshmuar gjithë fshati e më pas e ngushtoi rrethin e dëshmitarëve ndërsa kërkoi gjithashtu të shfaqeshin pamjet e një kamere sigurie ku dallohen 5 persona të armatosur.

“Ka të dhëna se është një person tjetër, se ai nuk ka qenë aty. Kjo është detyrë e prokurorisë dhe policisë për ta hetuar”, ka deklaruar avokati Ilir Murati.

Në seancën e ardhshme do të dëgjohen 7 dëshmitarë, që të gjithë efektivë policie që ishin në vendngjarje kur u vra Ibrahim Basha, si edhe të tjerë që kishin përpiluar planin e patrullimit në fshatin Lazarat, raporton TCH.