Ministri i Punëve të Brendshme të Shqipërisë, Ervin Hoxha ka vizituar Komandën e Gardës.

Gjatë vizitës atje, Hoxha ka prezantuar drejtorin e ri të Përgjithshëm të Gardës së Republikës, Ermal Onuzi, i cili u përzgjodh pas një procesi të hapur konkurrimi, me kandidatura profesionistë të fushës së sigurisë.

“Falënderova ish-Drejtorin Gramos Sako, që për mbi 10 vite udhëhoqi procesin e transformimit dhe reformimit të Gardës, si dhe Drejtorin e Komanduar Sami Kuti, që drejtoi institucionin për disa muaj për punën e bërë”, ka shkruar Hoxha në njoftimin e tij në Facebook.
Ai i ka uruar atij suksese në detyrën e rëndësishme, duke besuar fort se do të çojë para punët e nisura, për ta kthyer këtë trupë, në elitare.

Sipas tij si për çdo institucion tjetër, vijimi i reformimit edhe në Gardën e Republikës është i domosdoshëm, për ta bërë atë me eficiente në përmbushjen e misionit dhe detyrave për të garantuar sigurinë e personaliteteve të larta, të organeve të reja të drejtësisë, duke e shndërruar në një institucion modern e profesional.

“Shqipëria, ashtu si viti që lamë pas, do të presë në vijim forume politike të rëndësishme ndërkombëtare. Ndaj theksova se duhet angazhimi, që në bashkëpunim edhe me agjencitë e tjera ligjzbatuese të sigurohet mbarëvajtja e aktiviteteve”, ka shkruar tutje ai.

Ndërsa ka konfirmuar se në përmbushje të misionit të tij dhe vizionit për drejtimin e Ministria e Brendshme, me mbështetjen e Qeverisë dhe Kryeministrit Rama, do të bëj gjithçka me synimin që efektivët e Gardës së Republikës të jenë profesionistë të vërtetë, të dedikuar dhe të varur vetëm nga forca e ligjit./Arbresh.info/