Tre muaj pasi u shpall i pafajshëm për akuzat më të rënda të trafikimit seksual dhe shantazhit, reperi dhe producenti i njohur amerikan, Sean “Diddy” Combs, është dënuar me më shumë se katër vjet burg nga një gjykatë federale në Manhattan.

Vendimi u dha të premten nga gjyqtari Arun Subramanian, i cili theksoi se “veprat e tij kanë dëmtuar në mënyrë të pariparueshme dy gra”, duke refuzuar kërkesat e mbrojtjes për një dënim më të butë.

Në sallën e gjyqit, 55-vjeçari Combs mbeti i qetë ndërsa iu drejtua familjes së tij me fjalët:

Ju dua, më vjen keq

-përpara se dhjetëra të afërm dhe miq të shpërthenin në lot.

Reperi u shpall fajtor për transportim për qëllime prostitucioni, ndërsa u lirua nga akuzat për trafikim seksual dhe shantazh, të cilat mund t’i kishin sjellë burgim të përjetshëm.

Gjatë seancës, avokatët dhe fëmijët e tij e përshkruan Combs si një “njeri të ndryshuar”, duke apeluar për mëshirë dhe duke kërkuar uljen e dënimit.

Por gjykatësi ishte i prerë:

As fama dhe as veprat e mira nuk mund të fshijnë të kaluarën.

I përlotur, Diddy pranoi fajin dhe kërkoi falje publike nënës dhe familjes së tij, duke thënë:

E zhgënjeva si bir.

Pas shpalljes së dënimit, ai u përqafua me familjarët përpara se të shoqërohej nga rojet drejt burgut federal në Brooklyn.

Ky vendim shënon një kthesë të fortë në karrierën dhe imazhin e një prej figurave më të njohura të industrisë së hip-hop-it, duke mbyllur një proces gjyqësor që ka tërhequr vëmendjen e mediave dhe publikut në mbarë botën./tar