Kryetari i Aleancës për shqiptarët, Ziadin Sela është takuar me ambasadorin e Britanisë së Madhe në Maqedoni, Charles Garrett me të cilin kanë biseduar për perspektivat euro-atlantike të Maqedonisë.

”Në takim është biseduar për situatën aktuale politike, sfidat e vendit, përshpejtimin e procesit integrues dhe reformat në gjyqësor. Sela ka shprehur qëndrimin se reformat në gjyqësor janë të rëndësishme për të gjithë qytetarët e vendit, ndërsa praktikat e deritanishme të drejtësisë selektive duhet të marrin fund sa më parë. Në vazhdim Sela ka ripërsëritur qëndrimin se plotësimi i kritereve të BE-së dhe rekomandimeve të faktorit ndërkombëtar, është jetik për progresin e vendit” thuhet në njoftimin e partisë Aleanca për shqiptarët.

Nga ASH thonë se këto takime do të vazhdojnë edhe në të ardhmen ku Sela do të shpreh qëndrimet e partisë së tij me zyrtarë të vendeve të jashtme të përfaqësuara në Maqedoni, njofton Telegrafi Maqedoni.