Heshtje dhe qetësi mbizotëronte sot në rrugët e Gazi Babës dhe lagjeve të tjera të Shkupit pas aksionit policor për arrestimin e ish-pjesëtarëve në luftërat e vendeve të huaja.

Disa qytetarë të cilët ishin zgjuar në çastet e aksionit nuk deshën të flasin para kamerës. Edhe familjarët e të arrestuarve, disa prej të cilëve i vizitoi ekipi i televizionit Alsat-M kishin vendosur të heshtin.

Prapa kamerave ata u ankuan se policia në disa shtëpi kishte thyer dyert e hyrjes dhe kishte kthyer përmbys shtëpinë gjatë bastisjes, por nuk ishin në gjendje që para mikrofonit ta përshkruajnë aksionin.

Kamera e televizionit Alsat-M arriti të futej vetëm në shtëpinë e Rexhep Memishit, imam në xhaminë Tutunsuz.

Ekipi ynë vizitoi edhe këtë xhami por atë e gjetëm të boshatisur dhe në gjendje siç e kishte lënë policia. Derisa qëndruam aty, askush nuk erdhi në xhami, ndërsa as banorët e lagjes përreth xhamisë, nuk pranuan të prononcoheshin.