Ministri i Punëve të Jashtme të Serbisë, Marko Gjuriq, deklaroi mbrëmë se vendimi i autoriteteve turke për t’i dërguar dronë Kosovës është një veprim i njëanshëm dhe i paligjshëm, të cilin Serbia “do të duhet ta marrë parasysh në veprimet e saj të ardhshme”.

Në një postim në rrjetin X, Gjuriqi theksoi se dërgimi i dronëve turq për “regjimin e Albin Kurtit” përfaqëson “hedhje vajguri në zjarr dhe një shembull të qartë të ndërhyrjes dashakeqe në punët rajonale, me pasoja destabilizuese”.

“E dënoj fuqishëm këtë veprim të njëanshëm dhe të paligjshëm, i cili përbën një hap prapa në përpjekjet për normalizimin e marrëdhënieve në rajon dhe nxit një politikë agresioni ndaj serbëve dhe komuniteteve të tjera joshumicë në Kosovë”, shkroi ai.

Gjuriqi paralajmëroi se besimi ndërmjet palëve është i vështirë për t’u ndërtuar, por, për fat të keq, shumë më i lehtë për t’u shkatërruar.

“Vendimi i autoriteteve turke për t’i dërguar armë vdekjeprurëse regjimit të Kurtit është hedhje benzine në zjarr dhe një shembull i qartë i ndërhyrjes dashakeqe në punët rajonale me pasoja destabilizuese”, shtoi ai.

Udhëheqësi i diplomacisë serbe vlerësoi se ajo që i nevojitet Kosovës nuk janë dronët vdekjeprurës, por respektimi i të drejtave themelore të njeriut për të gjithë qytetarët, normalizimi i marrëdhënieve dhe zhvillimi ekonomik.

“Serbia do të duhet ta marrë këtë hap parasysh në veprimet e saj të ardhshme”, përfundoi Gjuriq.

Gjatë së djeshme, në Prishtinë u njoftua se kanë mbërritur dronët “Skydagger” të porositur nga Turqia, dhe sipas kryeministrit në detyrë Albin Kurti “kanë arritur mijëra dronë”.

Kosova më parë ka blerë dronët turq “Bayraktar TB2” dhe ata amerikanë “Puma”./Koha