Terren i papërshtatshëm për gazetarët, shënohen 26 raste të sulmit e kërcënimit

26 raste për sulme e kërcënime ndaj gazetarëve janë proceduar në Gjykatat e Kosovës, derisa 36 gazetarë kanë kërkuar ndihmë ligjore nga avokati Musa Dragusha.

Avokati Dragusha ka pothuajse një vit që është angazhuar nga Asociacioni i Gazetarëve të Kosovës për t’i ndihmuar gazetarët ligjërisht.

Avokati thotë se gazetarët po punojnë në një ambient të papërshtatshëm. Ai ka e përmendur edhe raportin e fundit të Human Right Watch për punën e medieve në Kosovë.

Se ky raport e pasqyron gjendjen reale dhe pozitën në të cilën veprojnë dhe ushtrojnë profesione e tyre gazetarët në Kosovë, e thotë edhe kryetari i AGK-së.

Gazetari i “Kohës Ditore”, Besnik Krasniqi thotë se kërcënimet janë kthyer në rutinë, derisa tregon se pavarësisht se sulmet që janë bërë ndaj tij janë denoncuar, organet e gjyqësisë asnjëherë nuk i kanë çuar rastet deri në fund.

Dhjetorin e kaluar AGK-ja angazhoi Musa Dragushën, i cili do t’i mbështesë gazetarët ligjërisht falas.