Prokuroria Themelore në Prishtinë, Departamenti për Krime të Rënda, në bashkëpunim me Policinë e Kosovës, Drejtorinë për Hetimin e Krimeve Ekonomike dhe Korrupsion, Inspektoratin Shëndetësor dhe Inspektoratin e Tregut, po zhvillon sot, një aksion të gjerë në Prishtinë.

Ky aksion realizohet në bazë të Urdhrit për Kontroll dhe Sekuestrim të Përkohshëm të Gjyqtarit të Procedurës Paraprake të Gjykatës Themelore në Prishtinë dhe përfshin kontrollin e 15 lokacioneve – bizneseve që dyshohet se janë përfshirë në veprimtari të kundërligjshme.

Prokuroria njofton se hetimi ka të bëjë me dyshimet për: keqpërdorim të pozitës ose autoritetit zyrtar, ushtrim të kundërligjshëm të veprimtarisë mjekësore dhe tregti të ndaluar, pasi këto biznese dyshohet se kanë ofruar shërbime estetike duke përdorur produktin medicinal Botoks, pavarësisht se shërbimi lejohet vetëm nga personeli i certifikuar.

“Ky aksion po realizohet në zbatim të Urdhrit për Kontroll dhe Sekuestrim të Përkohshëm të Gjyqtarit të Procedurës Paraprake të Gjykatës Themelore në Prishtinë, Departamenti për Krime të Rënda, për kontrollin e 15 lokacioneve – bizneseve që të gjitha në Prishtinë dhe sekuestrimin e provave që dyshohet se kanë të bëjnë drejtpërdrejtë me veprat penale në hetim, Keqpërdorimi i pozitës apo autoritetit zyrtare nga neni 414 të KPRK-së, Ushtrimi i kundërligjshëm i veprimtarisë mjekësorë nga neni 256 të KPRK-së dhe Tregti e ndaluar nga neni 299 të KPRK-së, kjo për shkak të ekzistimit të dyshimit të arsyeshëm se këto biznese, në kundërshtim me Ligjin për Produkte Medicinale, kanë ofruar shërbime estetike duke përdorur produktin medicinal Botoks edhe pse sipas ligjit, ofrimi i këtij shërbimi bëhet nga personeli i certifikuar”.

“Po ashtu, bazuar në të dhënat zyrtare, rezulton se në Republikën e Kosovës, nuk ka operator ekonomik të licencuar për importin e këtij produkti medicinal dhe si i tillë, ky produkt mbi këto rrethana, trajtohet si ilegal. Prokuroria Themelore në Prishtinë do të vazhdojë me përkushtim të plotë ndërmarrjen e masave ligjore ndaj çdo forme të veprimtarisë së kundërligjshme, me qëllim parandalimin dhe luftimin e kësaj dukurie negative në mbrojtje të interesit publik dhe shëndetit të qytetarëve”, thuhet në njoftim./Arbresh.info