Me mbështetje të Misionit të OSBE-së, Policia e Kosovës organizoi më 19 dhjetor 2024 në Prishtinë një punëtori njëditore për vlerësimin e zbatimit të Strategjisë së Integruar të Policimit të Drejtuar nga Inteligjenca dhe Policimit në Bashkësi, si dhe të Planit të Veprimit 2021-2025. Ky plan përmban pesë objektiva strategjike, 27 nën-objektiva dhe 99 aktivitete.

Sipas njoftimit, ky është vlerësimi i katërt vjetor dhe qëllimi i tij është t’iu ofrojë pjesëmarrësve një pasqyrë të progresit aktual për aktivitetet gjatë vitit 2024, si dhe i njëjti do të përdoret për të identifikuar vështirësitë gjatë zbatimit të planit të veprimit dhe për të nxjerrë rekomandime për zbatim në të ardhmen.

Kolonel Gazmend Hoxha, e vlerësoi mjaft të rëndësishme dhe të nevojshme implementimin e kësaj strategjie.

“Në këtë punëtori me një fjalë hyrëse pjesëmarrësve iu drejtua drejtori i Përgjithshëm i Policisë së Kosovës kolonel Gazmend Hoxha, i cili e vlerësoi mjaft të rëndësishme dhe të nevojshme implementimin e kësaj strategjie, e cila vlerësohet si një strategji bazë për implementimin edhe të strategjive tjera, të cilat ndihmojnë, lehtësojnë dhe avancojnë punën e Policisë së Kosovës, e në veçanti të avancimit të bashkëpunimit dhe partneritetit me komunitetin, si çelës i rritjes së vazhdueshme të sigurisë, integritetit, imazhit dhe besimit policor në vend. U kërkua që kjo strategji të implementohet dhe të monitorohet si e tillë, si dhe të planifikohet për vazhdimin e saj në të ardhmen”, thuhet në njoftim.

Anëtarët e grupit punues të PK-së bënë një përmbledhje mbi zbatimin e planit të veprimit brenda detyrave sipas kompetencës së departamenteve dhe drejtorive policore.

Pjesë e kësaj punëtorie ishin edhe përfaqësuesit e Ministrisë së Punëve të Brendshme, Inspektoratit Policor të Kosovës, misionit të OSBE-së në Kosovë, ICITAP-it, UNDP-së dhe drejtorët e divizioneve e drejtorive rajonale të PK-së, të cilët kontribuuan me komentet dhe rekomandimet e tyre./Arbresh.info