Policia e Ferizajt në këtë fundjavë ka ndaluar tre persona nën dyshimin se kanë përdorur armë të zjarrit në dasma dhe ahengje familjare.

Me këtë rast bëhet e ditur se personave në fjalë u janë konfiskuar edhe tri armë brezi dhe disa fishekë kalibrash të ndryshëm.

Sipas policisë arrestimi i këtyre personave hyn në vazhdën e zbatimit të planit operativ: “Sezoni veror 2015” dhe në masat e shtuara të Policisë në parandalimin e të shtënave të pakontrolluara me armë zjarri në dasma dhe ahengje”.

Policia në rajonin e Ferizajt ka intervenuar në tri raste të ndara. Me këtë rast, janë shoqëruar në polici tre persona, të cilëve edhe u janë konfiskuar tri armë brezi dhe disa fishekë kalibrash të ndryshëm. Pas intervistimit të të dyshuarve, Prokuroria vendosi që rastet të procedohen në procedurë të rregullt gjyqësore”, thuhet në njoftimin e Zyrës Rajonale për Informim.

Nisur nga këto raste dhe rreziku i vazhdueshëm nga të shtënat e pakontrolluara, Policia rajonale e Ferizajt ka bërë thirrje për kujdes të shtuar në dasma dhe ahengje familjare.

Ndryshe, Policia është e obliguar t’i ndërmarrë të gjitha masat e duhura ligjore në parandalimin e këtyre rasteve dhe në mbrojtjen e jetës së qytetarëve.