Ka përfunduar aksioni i Policisë dhe Prokurorisë lidhur me dyshimet për mashtrim

Përmes një komunikate të përbashkët nga policia dhe Prokuroria bëhet e ditur se janë kryer bastisje në pesë lokacione në Prishtinë, Kamenicë dhe në Viti.

Fillimisht janë arrestuar pesë persona të dyshuar, prej tyre një zyrtar i Shërbimit Korrektues, ndërsa pas intervistimit të tyre në stacion policor, të njëjtit janë dërguar në mbajtje, në kohëzgjatje prej 48 orësh nga Prokurori i Shtetit, për shkak të veprës penale “Mashtrimi”, sipas KPRK-së.

“Personat me inicialet: B.Sh., B.H., V.C., B.B. dhe L.B., dyshohen se nga muaji janar-prill 2024, në bashkëkryerje, me qëllim të përfitimit të kundërligjshëm të dobisë pasurore për vete i kanë vënë në lajthim palët e dëmtuara, kinse do t’iu shesin bitcoina, duke i nxitur kështu të veprojnë në dëm të pasurisë së tyre dhe me këto veprime kanë arritur të përfitojnë shuma të konsiderueshme të parave. Në këtë çështje penale janë në kërkim edhe dy (2) persona të tjerë të dyshuar, të cilët nuk janë gjetur në objektet përkatëse”, thuhet në njoftim.

Nga bastisjet e realizuara janë sekuestruar fatura e prova të tjera, të cilat do të shërbejnë në procedurën penale.

Prokuroria në koordinim me policinë do të vazhdojë me ndërmarrjen e veprimeve hetimore lidhur me këtë rast./Arbresh.info/

LEXO EDHE:

Aksioni i Policisë dhe Prokurorisë në Lipjan/ Arrestohen dy persona, sekuestrohen armë të gjata e municion

LAJMI I FUNDIT/Policia dhe Prokuroria po zhvillojnë disa aksione për mashtrim në disa lokacione