I dënuar me tri vjet burgim, kapet në Gjakovë i kërkuari për lëndim të rëndë trupor

18:34 | 8 Qershor 2026
H.E

Policia e Kosovës ka njoftuar se në kuadër të angazhimeve për zbatimin e ligjit dhe realizimin e urdhëresave gjyqësore, zyrtarët e Stacionit Policor në Gjakovë, respektivisht të Nënstacionit Policor në Ponoshec, kanë arrestuar një person të kërkuar nga drejtësia.

Sipas njoftimit, arrestimi është kryer më 8 qershor 2026, rreth orës 14:10, në fshatin Rracaj të Gjakovës, ku është lokalizuar dhe arrestuar personi me inicialet K.B.

I njëjti kërkohej me urdhëresë të Gjykatës Themelore në Gjakovë për veprat penale “Lëndim i rëndë trupor” dhe “Mbajtje në pronësi, kontroll ose posedim të paautorizuar të armëve”.

Policia bëri të ditur se pas arrestimit dhe përfundimit të procedurave ligjore, i dënuari është dërguar në institucionin korrektues për vuajtjen e dënimit me burg në kohëzgjatje prej tre vitesh./Arbresh.info