Presidentja e Kosovës, Vjosa Osmani ka thënë se Ditën e pavarëisë së Shqipërisë, ditëlindjen e komandantit legjendar Adem Jashari dhe daljen e parë publike në skenë, i bashkon flamuri kuq e zi.

Me anë të një postimi në Facebook, Osmani u shpreh se flamuri kombëtar është trashëgimi e përjetësuar në simbol që nga viti 1443 në Krujë, 1912 në Vlorë dhe 1999 në Prishtinë, shkruan Arbresh.info.

“Kjo ditë është dedikim për heronjtë tanë që prej Gjergj Kastriotit, Ismajl Qemajlit, Hasan Prishtinës, Isa Boletinit e deri te Adem Jashari, vepra e të cilëve është vula e shtetit të Shqipërisë dhe atij të Kosovës.”, shkroi ajo.

Tutje ajo uroi Shqipërinë në 111 vjetorin e Pavarësisë duke thënë se Kosova do të jetë gjithmonë në krah të saj.

“Republikës së Shqipërisë ia përcjell urimet më të ngrohta të qytetarëve dhe të institucioneve të Kosovës në këtë 111 vjetor. Kosova do të jetë gjithnjë në krah të Shqipërisë, duke thelluar më tej lidhjet ndërshtetërore, sikurse edhe ato ndërmjet motrave e vëllezërve!”, tha ajo.

“Gëzuar të gjithëve!”, uroi Osmani./Arbresh.info/