Moska thotë se EULEX-i e ka miratuar arrestimin e Gjuriqit

17:30 | 4 Prill 2018
Arbresh.info

Zëdhënësja e Ministrisë së Punëve të Jashtme të Rusisë Maria Zaharova e ka akuzuar EULEX-IN se ka qenë në dijeni se do të arrestohet shefi i së ashtuquajturës Zyrë për Kosovën në Qeverinë e Serbisë, Marko Gjuriq, pas futjes së tij në mënyrë ilegale në territorin e Kosovës, dhe këtë e ka miratuar në mënyrë të heshtur, transmeton Gazeta Express.
“Forcat ndërkombëtare në Kosovë, në bazë të Rezolutës 1244, kanë përgjegjësinë kryesore për sigurinë e popullatës joshqiptare”, ka thënë Zaharova, duke shtuar se pikërisht EULEX-i “ashiqare ka dhënë miratimin e heshtur” për arrestimin e Gjuriqit.

Marko Gjuriq, megjithëse i ishte refuzuar leja për të hyrë në Kosovë, ishte futur në mënyrë klandestine në Mitrovicë, për të marrë pjesë në një organizim të serbëve, pas çka u arrestua, me pranga në duar u soll në Prishtinë dhe më pas u dëbua nga Kosova.