Shefja e GP të LVV-së, Mimoza Kusari-Lila ka thënë se është thellësisht zhgënjyese mos futja në agjendën e Këshillit të Ministrave anëtarësimi i Kosovës në KiE.

Kusari-Lila para mediave potencoi se Kosova shpesh herë ka përjetuar padrejtësi nga faktori ndërkombëtar, duke theksuar edhe kushtet që i ishin vendosur vendit për liberalizimin e vizave, shkruan Arbresh.info.

“Prej shpalljes së Pavarësisë, Kosova ka përjetuar padrejtësi të ndryshme nga faktori ndërkombëtar apo Bashkimi Evropian. Përderisa ka qenë shumë e qartë se çfarë është kërkuar nga Kosova për anëtarësimin në Këshillin e Evropës në Asamblenë Parlamentare, ai standard ka ndryshuar siç kishte ndryshuar dikur standardi për liberalizimin e vizave me kushte dhe kritere të ndryshme. Me anëtarësimin e Kosovës në KiE është garancia më e madhe se çka do tjetër për të drejtat e të gjitha komuniteteve pa dallim. Prandaj Kosova mbetet e përkushtuar në zbatimin e të drejtave të të gjitha komuniteteve por gjithashtu edhe në rrugëtimin e saj për integrimin plotë”, tha Kusari-Lila.

“Jemi thellësisht të zhgënjyer me atë çfarë ndodhi. E kuptojmë se ka pasur kërkesa individuale të shteteve pastaj në raport me përpjekjet e plotësimit të të gjitha standardeve që kanë të bëjnë me të drejtat dhe rendin e ligjin. Ka qenë një përvojë jo e mirë por nuk është hera e parë që Kosova është ballafaquar me një standard shtesë nga ajo që KiE kishte për vendet e tjera”, shtoi ajo./Arbresh.info