Pandemia Covid-19 ka ndryshuar edhe jetesën në Qendrën Studentore në Prishtinë.

Duke respektuar rekomandimet e Institutit të Shëndetësisë Publike, këtë vit në konvikte janë pranuar vetëm 1600 studentë.

Drejtori i Përgjithshëm i Qendrës Studentore, Fatmir Sfishta thotë se sipas rekomandimeve të institutit një student duhet të qëndrojë në një dhomë.

“Është për keqardhje që një numër i madh i studentëve kanë mbetur jashtë. Mirëpo kjo nuk varet nga ne. Këtë vit janë pranuar 1600 studentë”, tha ai.

Ky është Albatrit Zeqiri, student i vitit të tretë në Fakultetin Juridik i cili ushqehet çdo ditë nga mensa e studentëve.

Drejtori i mensës, Fahri Osmani tregon se edhe mensa e studentëve po funksionon sipas rekomandimit të IKSHPK-së.

“Kjo po funksionon shumë mirë. Kemi diskutuar edhe me studentët janë shumë të kënaqur. Këtu menyja është mjaft e pasur”, tha ai.

Më herët flinin ka dy ose tre veta në një dhomë, tani brenda kësaj dhome mund të qëndrojë vetëm një student.

Kjo është Laureta, e cila jeton vetëm në këtë dhomë.

Pavarësisht gjendjes, çmimi në Qendrën e Studentëve nuk ka ndryshuar. Vazhdon të mbetet 20 euro për konvikt dhe 15 euro për mensë./arbresh.info/