Lëvizja për Drejtësi, përmes një komunikate për media, ka kërkuar funksionalizimin e Këshillit Shtetëror për Arsimin e Lartë, si një organ të pavarur nga Ministria e Arsimit Shkencës dhe Teknologjisë. Vendimi i fundit rreth Universitetit Publik në Prizren, Pejë dhe Mitrovicë më shumë po tingëllon si konflikt ndërpartiak se sa masa për degradimin e arsimimit universitar.

Mes Universiteteve Publike qasja e menaxhimit dhe standardet nuk kanë një dallim të theksuar. Lëvizja për Drejtësi kërkon një sistem arsimor të paideologjizuar dhe të çliruar nga particizimi dhe kuadrot e papërgatitur. Pretendime për të përhapur ndikimin partiak në universitetet publike është një praktik në këto 20 vite, për sqarimin e këtij realitetit nuk kemi nevojë për asnjë raport profesional e as ndërkombëtar.

Arsimi superior duhet të jetë në përputhje me standardet dhe kriteret e universiteteve evropiane, me qëllim që studentëve t’iu sigurohet cilësia në mënyrë që të kenë mundësi qasjeje në universitetet evropiane. Kosovës i nevojitet një trend bashkëkohor i zhvillimit të shoqërisë kosovare në përputhje me kërkesat dhe nevojat për zhvillim kulturor, shkencor dhe me theks të veçantë investimin në arsimim profesional duke synuar inkurajimin e projekteve kërkimore shkencore.

Sipas ligjit nr. 04/L-037 “PËR ARSIMIN E LARTË NË REPUBLIKEN E KOSOVËS” është paraparë krijimi i Këshillit Shtetëror për Arsimin e Lartë. Për të siguruar cilësinë në arsimimin universitar, Lëvizja për Drejtësi kërkon funksionalizimin e Këshillit Shtetëror për Arsimin e Lartë, si një organ të pavarur nga Ministria e Arsimit Shkencës dhe Teknologjisë. Universitet Publike dhe private duke i pavarësuar nga Ministria duhet të shërbejnë nën mbikëqyrjen e Këshillit Shtetëror të Arsimit të Lartë.

Këshilli Shtetëror i Arsimit të Lartë me një status të veçantë duhet të ketë një rol dhe buxhet të posaçëm dhe të monitorojë mbarëvajtjen e punës shkencore në universitetet publike dhe kolegjet private, thuhet në fund të kësaj komunikate nga Lëviza për Drejtësi.