Përçarjet në Lidhjen Demokratike të Kosovës (LDK) janë një fenomen që kanë ndodhur herë pas here gjatë historisë së saj, e sidomos pas zgjedhjeve.

Një e tillë ndodhi edhe pas zgjedhjeve të 9 shkurtit, ku disa ditë pasi kjo parti mbajti mbledhjen e Kryesisë së LDK-së, dolën në pah përplasjet.

Një mbledhje mjaftoi që brenda LDK-së të ‘plasin’ deklaratat e akuzat kundrejt njëri tjetrit.

Deputeti i kësaj partie, Avdullah Hoti ka kërkuar lidership të ri në këtë parti.

Se kush ka të drejtë në këtë mes, analisti Artan Muhaxhiri thotë se gjithë konteksti u ndërtua kur lidershipi aktual i LDK-së tentoi ta prezantojë rezultatin zgjedhor të 9 shkurtit si sukses, ndonëse realisht përqindja është dashur të jetë më e madhe.

Sipas tij në vend që të ndodhte reflektimi dhe analiza për shkaqe të mospasjes së rritjes së duhur të elektoratit, erdhi interpretimi pozitiv i vendit të tretë dhe dallimit prej 22 për qind ndaj Lëvizjes Vetëvendosje parti e cila nuk pati arritje zhvillimore gjatë mandatit katërvjeçar.

“Problemi kryesor me reagimin e Avdullah Hotit është se ky konflikt i brendshëm tashmë është shndërruar në të jashtëm, gjë që e vështirëson zgjidhjen e tij. Reagimet e para ndaj tij ishin naive, krejtësisht të kundërta me seriozitetin e gjendjes. Kjo çarje do të vazhdojë edhe më tej, përderisa kritikat e theksuara të mos adresohen substancialisht nga Kryetari Abdixhiku”, thotë Muhaxheri.

Nga ana tjetër analistja Magbule Shkodra thotë se ish kryeministri i Kosovës, Avdullah Hoti ka të drejtë të bënte një kërkesë të tillë.

Por, sipas saj është dashur të pritej deri në formimin e Qeverisë së re dhe më pas të bëhej një kërkesë e tillë.

“Së pari dua të them se kryetari i LDK-së, Lumir Abdixhiku pas përfundimit të zgjedhjeve e bëri një deklaratë ku ai ndër të tjera tha se do të jap përgjegjësi para strukturave të partisë për rezultatin e zgjedhjeve . Tani Avdullah Hoti i cili po kërkon përgjegjësi dhe lidership ka të drejtë të bëj një kërkesë të tillë, unë vetëm se mendoj se momenti nuk ka qenë i duhur, ndoshta ishte dashur të pritet të bëhet formimi i qeverisë, e pastaj të kërkohet besimi i Lumir Abdixhikut nga strukturat e partisë”, thotë analistja.

Ndër tjerash, Shkodra thekson se liderët partiakë duhet të mësohen që pas zgjedhjeve që nëse nuk arrin rezultatin e premtuar duhet të japin përgjegjësi.

“Vetëm se në rastin LDK-së, koha nuk ka qenë adekuate më mirë ka qenë të pritej pas formimit të Qeverisë dhe para zgjedhjeve lokale, dhe aty të kërkohet besimi për Abikixhuin dhe nëse e fiton përsëri besimin, atëherë ai si lider do të jetë shumë i fortë për ta vazhduar udhëheqjen e LDK-së”, përfundon ajo.

Në zgjedhjet e 9 shkurtit, Lidhja Demokratike e Kosovës fitoi 18 për qind të votave.

LDK-ja u rendit e treta pas Lëvizjes Vetëvendosje që doli e para dhe Partisë Demokratike të Kosovës që zuri vendin e dytë.

Me këto vota, LDK-ja siguroi vetëm 20 deputetë në përbërjen e re të Kuvendit të Kosovës. Por rezultati jo i kënaqshëm shkaktoi mospajtime dhe kërkesa për ndryshimin e udhëheqjes në parti. Avdullah Hoti, anëtar i kryesisë dhe një nga figurat e rëndësishme të LDK-së, kërkoi publikisht ndryshime.

Ai kritikoi mënyrën se si LDK-ja bëri opozitë, si dhe riorganizimin dhe programin me të cilin garoi në zgjedhjet nën udhëheqjen e Lumir Abdixhikut, që haptas tha se merr përgjegjësinë për rezultatin.

“Përgjegjësinë për këtë rezultat e marr në tërësi unë edhe për fushatën, edhe për drejtimin e partisë dhe do t’i japë llogari vetëm Lidhjes Demokratike të Kosovës”, kishte deklaruar Abdixhiku.

Megjithatë, Abdixhiku nuk i është përgjigjur kërkesave të fundit të ish-kryeministrit Hoti.

Në mbrojtje të tij doli nënkryetarja Doarsa Kica Xhelili.

“Së pari, Lumir Abdixhiku nuk ka shumë që është votuar si kryetar i Lidhjes Demokratike të Kosovës unanimisht. Së dyti, Lumir Abdixhiku duke qenë në krye të Lidhjes Demokratike të Kosovës, e ka arritur për gati 70 për qind Lidhjen Demokratike të Kosovës”, kishte deklaruar

Kica Xhelili në një prej mediave. Hoti kritikoi Abdixhikun dhe strukturat e larta udhëheqëse të LDK-së edhe për favorizimin e figurave të caktuara dhe për mënjanimin e njerëzve të rëndësishëm të partisë.

I zëshëm kundër udhëheqjes aktuale u shpreh edhe ish-kryetari i Podujevës, ish-deputeti dhe ish-ministri Agim Veliu, i cili nuk u përfshi në listën zgjedhore të 9 shkurtit

“Renditjen e ka bërë vetë, renditje skandaloze ka qenë, duke lënë, ta zëmë, Avdullah Hotin, ish-kryeministrin e LDK-së, figurën e LDK-së, të 13-tin, kryetarin e grupit parlamentar të 14-tin”, kishe deklaruar Veliu.

Pakënaqësitë e Hotit dhe Veliut u shprehën pas mbledhjes së kryesisë së LDK-së, që u mbajt më 10 mars.

Në këtë mbledhje, e cila zgjati më shumë se 5 orë, u raportua edhe për anëtarë të tjerë të Kryesisë që kërkuan ndryshime.

Por pas mbledhjes, Abdixhiku kishte thënë se ka mbështetje dhe se do ta vazhdojë punën për rritjen e LDK-së./Arbresh.info/Kujtesë Berisha/