Misioni i NATO-s në Kosovë, KFOR-i, ka bërë të ditur se nga Forca e Sigurisë së Kosovës i është konfirmuar që hyrja e një konvoji të kësaj force në veri të Kosovës gjatë ditës, ka ndodhur gabimisht.

KFOR-i ka thënë se i pranon deklaratat nga Policia e Kosovës dhe Forca e Sigurisë së Kosovës se njësiti përkatës i FSK-së gabimisht kishte devijuar nga kursi i saj për disa minuta dhe menjëherë ishte kthyer në itinerarin origjinal të tij, në jug të Kosovës.

“KFOR-i mirëpret respektimin e vazhdueshëm nga FSK-ja të marrëveshjes për të mos dërguar personel të FSK-së në veri të Kosovës, pa njoftim paraprak dhe pajtueshmëri nga komandanti i KFOR-it. Kjo pikë u ritheksua edhe në një telefonatë sot mes komandantit të KFOR-it dhe komandantit të FSK-së. Komandanti i FSK-së ritheksoi se njësiti i FSK-së gabimisht kishte devijuar përkohësisht nga kursi i tij”, thuhet në një përgjigje për KOHËN nga KFOR-i.

LEXO EDHE:

FSK për hyrjen në veri: Pjesëtarët tanë ngatërruan drejtimin e lëvizjes, ishin nisur nga Istogu

KFOR-i ka thënë se është i pozicionuar mirë në të gjithë Kosovën, përfshirë edhe në veri dhe është i gatshëm t’i përgjigjet çdo zhvillimi përkatës të sigurisë, në përputhje me mandatin që i buron nga Kombet e Bashkuara.

Disa automjete të Forcës së Sigurisë së Kosovës (FSK) kishin hyrë gabimisht në territorin e Mitrovicës së Veriut gjatë ditës së enjte, ku kanë qëndruar për disa minuta, bëri të ditur të enjten shefi i sektorit të informimit publik të FSK-së, Vëllazërim Qerimi. Të njëjtin version e dha edhe zëvendësdrejtori i Policisë së Kosovës për rajonin e veriut, Veton Elshani.

“Forca e Sigurisë së Kosovës njofton publikun që sot me datë 16.10.2025 në ora 10:30, gjatë lëvizjes së konvojit të FSK-së nga Istogu për në kazermën e FSK-së në Mitrovicë, pjesëtarët e FSK-së me automjete e kanë ngatërruar drejtimin e lëvizjes”, ka thënë shefi i sektorit të informimit publik në FSK.

E zëvendësdrejtori i Policisë së Kosovës për veriun, Veton Elshani, tha se konvoji i FSK-së kaloi rreth pesë minuta në një stacion karburanti, ku policia i ka parë dhe i ka pyetur për situatën. Sipas Elshanit, pjesëtarët e FSK-së u përgjigjën se kishin gabuar vendndodhjen dhe menduan se ishin në Mitrovicën e Jugut.

Dislokimi i FSK-së në veri të vendit është i mundur vetëm me pëlqimin paraprak të misionit paqeruajtës të NATO-s në Kosovë, KFOR, bazuar në zotimin e vitit 2013 nga Qeveria e Kosovës ndaj NATO-s. Ky angazhim, i dhënë përmes një letre nga ish-kryeministri Hashim Thaçi drejtuar sekretarit të atëhershëm të NATO-s, Anders Fogh Rasmussen, mbetet në fuqi edhe sot, pavarësisht ndryshimeve në mandatin e FSK-së.

LEXO EDHE:

Jashari: Do të ketë masa ndaj ekipit që hyri “gabimisht” në veri