Kryetari i SBAShK-ut, Rrahman Jasharaj para fillimit të takimit me presidenten e Republikës së Kosovës, Vjosa Osmani ka bërë të ditur se greva vazhdon, pavarësisht pakos së re që ka prezantuar sot kryeministri i vendit, Albin Kurti, me të cilin i gjithë sektori publik do të mbështetet me nga 50 euro deri në fund të vitit.

“Jemi optimist se zonja presidente do të jep kontributin e saj që dialogu të jetë i vërtetë. Deri më tani ky dialog ka munguar dhe ky vendimi sot është një anshëm pa u konsultuar me sindikatat. Greva vazhdon”, tha Jasharaj.

Presidentja Vjosa Osmani ka bërë thirrje të enjten që të ndërpritet greva.

Ajo sot është takuar edhe me Këshillin e Prindërve.

Në anën tjetër, Kryeministri Kurti në një konferencë për media e përsëriti kërkesën për ndalimin e grevës dhe fillimin e mësimit për nxënësit, duke potencuar se kanë marrë vendim për ndarjen e shumës prej 50 euro për zyrtarët publik deri në fund të vitit.

Kurti sërish kritikoi qasjen e SBASHK-ut duke thënë se ta bojkotosh shkollën, është si ta bojkotosh shtetin.

Ai përsëri i cilësoi si absurde dhe irracionale kërkesat e tyre./arbresh.info/