Pavarësisht situatës së krijuar me pandeminë e koronavirusit, investimet e huaja në Kosovë nuk e kanë ulur vlerën e tyre.

Të dhënat e Bankës Qendrore të Kosovës tregojnë për arbresh.info se nga muaji janar deri në muajin shtator të këtij viti, vlera e investimeve të huaja në Kosovë ka arritur deri në 250 milionë, në krahasim me periudhën e njëjtë të një viti më parë, ku vlera e investimeve të huaja kishte arritur vlerën prej 216.4 milionë euro.

Pra, sipas të dhënave të kësaj banke është një rritje prej 34 milionë eurove.

“Vlera e përgjithshme e investimeve të huaja në Kosovë për periudhën janar-shtator 2020, ishte 250.7 milionë euro që është një rritje prej 34.3 milionë euro në krahasim me periudhën e njëjtë të një viti më parë, ku vlera e investimeve të huaja për të njëjtën periudhë, arriti vlerën prej 216.4 milionë euro”, thonë nga BQK.

Ndërsa investimet më të mëdha thonë se janë bërë në sektorin e patundshmërive dhe shërbimeve financiare, minierat, bujqësia etj.

“Pjesa më e madhe e investimeve është bërë në sektorin e patundshmërive dhe të shërbimeve financiare, minierat, bujqësia etj”, thonë nga BQK

Ndër të tjerash arbresh.info ka tentuar të marr një përgjigje nga Ministria e Tregtisë dhe Industrisë lidhur me atë se a kanë qenë të shumta kërkesat për të investuar në vend.

Por, pavarësisht tentimeve, këta të fundit nuk kanë dhënë asnjë përgjigje.

Sipas Ligjit për Investime Strategjike, statusi i investuesit strategjik vlerësohet ai që i kontribuon rritjes ekonomike, punësimit dhe zbatimit të teknologjive të reja apo që ndikon në rritjen e mirëqenies dhe kushteve të jetës së qytetarëve të Republikës se Kosovës.

Kujtojmë se shuma më e lartë e investimeve të huaja në Kosovë ka qenë 440 milionë euro në vitin 2007, ndërkaq më e ulëta, në vitin 2014 me vetëm 151 milionë euro./E.H/arbresh.info/