Ministrja në detyrë e Drejtësisë, Albulena Haxhiu, ka thënë se deputetët e LVV-së ishin të gatshëm të ofrojnë zgjidhje me qëllim që ta korrigjojnë gabimin e Kuvendit me mosbotimin e Raportit për verifikimin e mandateve.

Haxhiu tha se kryesuesi i seancës konstituive, Avni Dehari, nuk mund të marrë vendime kokë në vete, prandaj sipas saj, i ftoi në takim përfaqësuesit e partive politike.

Në rrjetin social Facebook, Haxiu shkroi se duhet dakordim me partitë politike në mënyrë që të dalin nga bllokada.

Postimi i plotë:

Ne ishim të gatshëm të ofrojmë zgjidhje me qëllim të korigjimit të gabimit të Kuvendit me mosvotimin e Raportit për verifikimin e mandateve.

Kryesuesi i seancës konstituive nuk mund të merr vendime kokë në vete prandaj edhe i ftoi në takim përfaqësuesit e partive politike.

Pra duhet konsultim sepse duhet të kemi konsensus për rrugën që duhet ta ndjekim në mënyrë që të konstituojmë Kuvendin e Republikës së Kosovës.

Vetëm kur ka dakordim ndërmjet partive, dalim nga bllokada e shkaktuar nga opozita.

Qëndrimi ynë është që duhet të dakordohen partitë politike si të vazhdohet. Kur dakordohemi dhe e votojnë raportin, dalim nga bllokada.

Nuk parashihet askund se çfarë ndodhë nëse nuk verfikohen mandatet prandaj duhet të ketë propozime nga partitë politike por opozita sot vazhdoi me avazin e vjetër të bllokimit dhe kërkesës së stërvjetëruar për dorëheqjet të cilat i kemi adresuar me kohë.

Ne jemi të hapur për propozime që dërgojnë deri në konstituimin e Kuvendit por assesi nuk i pranojmë lojrat e opozitës dhe kërkesat absurde dhe që nuk mbështeten askund./Arbresh.info