Deputeti i Vetëvendosjes, Ilir Kërçeli, ka deklaruar se ka pasur komunikime për çështjen e presidentit, por jo pazare për këtë pozitë.

Ai tha se komunikimi po vazhdon.

“Komunikimi është edhe sot, por jo pazare. Vazhdimisht ka komunikim dhe pazari është një dallim i madh, dy kahje shumë të kundërta”, tha Kërçeli.

Ai tha se partitë tjera nuk po e sjellin asnjë emër.

“Krahasimi për zotin Konjufca nuk qëndron, sepse atëherë nuk është se nuk deshëm me ba zgjidhje, përkundrazi atëherë u ba zgjidhja, por tash nuk e sjellin asnjë emër dhe kur nuk e sjell asnjë emër, kur afati po ecë, kur koha po ecë, kur ti e ki një deputet që ka dalë i dyti më i votuari, nuk po e vendosim si me thanë me short kush po del aty, se po bëjmë hajgare me qytetarë, përkundrazi po e kandidojmë njeriun e dytë në histori të Kosovës, njeriun për të cilin opozita e Kosovës ka pasur fjalët më të mira. Bile LDK, e përmenda edhe më herët, kryetari i LDK-së ka thënë decidivisht: ‘Ku është ta kemi një Glauk Konjufca’”, shtoi Kërçeli.

Sipas tij, vendi nuk ka nevojë për zgjedhje.

“Vendit nuk i duhen dhe nuk i nevojiten zgjedhje të reja sepse nuk kanë kaluar as katër muaj prej kur ka përfunduar procesi zgjedhor i 28 dhjetorit 2025 dhe mendoj se qytetarët kanë votuar për katër vitet e ardhshme dhe mendoj se për vendin është shumë herët, besa edhe pak e dëmshme, që të shkohet tani menjëherë në zgjedhje të reja”, tha Kërçeli./BetimipërDrejtësi