Sekretarja e Përgjithshme e PDK-së, Vlora Çitaku, ka reaguar pas konferencës që mbajti sot kryeministri në detyrë, Albin Kurti, duke thënë se duhej të mbahej në selinë e partisë e jo në ndërtesën e Qeverisë.

Çitaku ka thënë se Kurti për nëntë muaj, ka thënë se i ka numrat për Qeverinë.

“Sot, me nënqeshje ironike, pranoi se i paska pasur “verës”, me votim të fshehtë, por tani nuk i paska më. Ndërkohë, Kosova është e izoluar, nën sanksione, me ekonomi të rënduar e me çmime të papërballueshme për familjet tona”, ka shkruar Çitaku.

Ajo ka thënë se populli tashmë e njeh Kurtin dhe e di çfarë sjell qeverisja e tij.

Sipas saj, për Kurtin shteti është skenë teatri dhe qytetarët publik që duhen argëtuar me shfaqjen e radhës.

“Njeriu që nuk ka lënë vlerë pa nëpërkëmbur e njeri pa fyer, sot fliste sërish për nevojën që ai të fitojë “referendumin”, jo zgjedhjet. Sepse për të, qeverisja ka kuptim vetëm nëse sundon i vetëm. Po e kemi parë tashmë se çfarë do të thotë sundimi i tij. Pesë vite me pushtet absolut. Rezultatet? Izolim, varfërim, ikje masive të qytetarëve tanë”, ka shkruar ajo.