Çitaku në Këshillin e Sigurimit të OKB-së: Kosova nuk është projekt i përkohshëm

22:45 | 31 Tetor 2019
Arbresh.info

Ambasadorja e Kosovës në SHBA, Vlora Çitaku, ka thënë në mbledhjen e Këshillit të Sigurimit të OKB-së se Kosova ka organizuar zgjedhje demokratike me 6 tetor në të cilat është shënuar dalje rekorde, përfshirë të gjitha komunitetet.

Çitaku ka thënë se 18 vjeçarët në këto zgjedhje kanë pasur mundësinë që të votojnë të zgjedhurit e tyre, kurse 18 vjeçarët 20 vjet më parë kanë qenë refugjatë,

Ajo para anëtarëve të këshillit, ka thënë se Republika e Kosovës nuk është një projekt i përkohshëm.

Ndërsa kundërpërgjigje ka pasur edhe për ministrin e Jashtëm të Serbisë, Ivica Daçiq që në fjalën e tij përmendi idenë e krijimit të “Shqipërisë së Madhe”,

“Shqipëria e Madhe” është vetëm një mit. Do të ketë shqiptarë, serbë… që do të jetojnë në Kosovë, Serbi, kudo në Ballkan”, ka thënë Çitaku, njofton Klan Kosova.

Çitaku ka përmendur edhe rastin e vrasjes së politikanit serb nga Kosova, Oliver Ivanoviq, duke thënë se ka disa të arrestuar për që i dyshuari kryesor fshihet në Beograd dhe gjithashtu që Serbia ka lobuar nëpër shtete që të mos votojnë pranimin në Interpol çka ka bërë që Prishtina ta tërheq aplikacionin.