Janë bërë 22 vjet që nga përfundimi i luftës në Kosovë, mirëpo ende nuk është bërë asgjë në drejtim të personave të pagjetur që sot e kësaj dite vazhdojnë të figurojnë si persona të zhdukur në vitet 1998-1999.

Në një intervistë për arbresh.info, përfaqësues i Shoqatës së Familjarëve të Personave të Pagjetur, Bajram Çerkini thotë se ende nuk dihet fati i 1600 personave, të cilët janë marrë nga forcat serbe gjatë luftës.

“Janë 1600 njerëz të marrë, disa të gjallë e disa mjerisht të copëtuar dhe ende nuk e dimë se ku janë. Çka është ka bëhet? Çka është ka punohet? Për ne familjarët është shumë pak ka punohet dhe është ka luhet një farë loje e cila e shtynë ditën për ditë”.

Çerkini, fajin kryesor për mos zbardhjen e këtyre rasteve e ka drejtuar tek udhëheqësit politik që kanë udhëhequr nga koha e shpalljes së Pavarësisë e deri sot.

Sipas tij, nuk po bëhet aq sa duhet në këtë drejtim.

“Për neve, faji kryesor është prej shpalljes së Pavarësisë e deri më sot. Nuk kanë bërë as nuk i kanë qit kushte Serbisë për atë çka ata e dinë. Nuk besoj që ata nuk e dinë, pra, çdo udhëheqës i Republikës së Kosovës se çka duhet të bisedohet rreth të pagjeturve, sepse adresa kryesore është në Serbi. Nuk e kanë seriozitetin sa duhet për persona të pagjetur, serioziteti për persona të pagjetur duhet të jetë shumë i madh”, tha Çerkini.

Tutje ai, tha se në bisedimet Kosovë-Serbi nuk duhet shkuar pa dokumentacionin e saktë, atë të NATO-së.

“Për çka me shku me bisedu pa dokumentacion , ai që është i saktë, janë këta që të kanë përcjell prej qiellit ata janë NATO” ka thënë Cerkini./arbresh.info/Sahide Dedushi/

Ndiqeni intervistën plotë