Bashkësia Islame fillon grumbullimin e ndihmave për zonat që u prekën nga vërshimet

22:56 | 21 Janar 2023
H.E

Bashkësia Islame e Kosovës (BIK) ka bërë thirrje për grumbullimin e ndihmave të cilat janë paraparë për qytetarët e prekur nga vërshimet.

Përmes një postimi në rrjetin social Facebook BIK-u vlerëson lart mobilizimin dhe gatishmërinë e Shoqatës Humanitare “Bereqeti” në kuadër të BIK-ut (me të gjitha degët e saj anekënd Kosovës) dhe angazhimin e saj për t’i ndihmuar me gjëra ushqimore dhe veshmbathje banorët e prekur nga vërshimet.

“Bashkësia Islame e Kosovës u bën thirrje qytetarëve të Kosovës që të ndihmojnë me dhurim të ndihmave të ndryshme materiale për të prekurit nga vërshimet në Mitrovicë, Skenderaj dhe në zonat e tjera të Kosovës”- thuhet në njoftimin e BIK-ut.

Gjithashtu është bërë e ditur se të premtën do të bëhet grumbullimi i parave në të gjitha xhamitë për të ndihmuar banorët e zonave të prekura nga vërshimet e fundit në Kosovë./arbresh.info/