I dyshuari M.P., është arrestuar sot në Pikën e Kalimit Kufitar në Merdare, për krime lufte.

Përmes një komunikate për media, thuhet se hetuesit policorë nga Drejtoria për Hetimin e Krimeve të Luftës, nën autorizimet e Prokurorit të Shtetit në Prokurorinë Speciale të Republikës se Kosovës, për një periudhë kohore kanë zhvilluar veprime  hetimore, mbledhje të dëshmive e provave dhe identifikimin e  kryerësve të veprave penale  të krimeve të luftës, shkruan Arbresh.info.

Këto hetime kanë qenë të përqendruara rreth zbulimit të autorëve të krimeve të kryera në periudhën 1998-1999 në rajonin e komunës së Istogut.

Tutje thuhet se pas një pune intensive është arritur që të mblidhen dëshmitë dhe provat për krimet dhe kryesit e këtyre veprave penale.

“Hetuesit policorë kanë  pranuar dhe përpunuar informata të shumta operative në drejtim të identifikimit, vendndodhjes dhe lokalizimit të të dyshuarit, aktivitetit dhe lëvizjeve të  tij, në dhe jashtë territorit të Kosovës. Procesi hetimor është ndihmuar nga zyrtarët e Agjencisë së Kosovës për Inteligjencë me të cilët është bashkëpunuar ngushtë në një punë ekipore, ku është bërë përpunimi inteligjent i informatave”, thuhet në njoftim.

Nga bashkërendimi i aktiviteteve është bërë e mundur të identifikohet një i dyshuar për krime lufte, i cili në kohën e luftës 1998-1999 ishte krye-shef i milicisë në Istog.

Me aktvendim nga prokurori i njëjti është dërguar në mbajtje deri në 48 orë./Arbresh.info/