Zëvendësministri i Infrastrukturës, Hysen Durimishi ka njoftuar për arrestimin e zyrtarëve, të cilët kanë punuar në Njësinë për Patentë Shoferë.

Përmes një video në Facebook, Durmishi ka falënderuar organet e drejtësisë për veprimet që janë ndërmarrë deri tani.

“Në Pejë kanë ndodhur arrestimet e zyrtarëve për Njësinë e Patentë Shoferë. Ne me kohë i kemi raportuar këto raste. Shpresoj se kjo çështje do të shkojë deri në fund, dhe të gjitha ata që janë të përfshirë të marrin dënimin e merituar. Falënderoj organet e drejtësisë për veprimet që janë ndërmarrë deri tani”, thotë Durmishi.

Një aksion po zhvillohet nga Drejtoria për Hetimin e Krimeve Ekonomike dhe Korrupsionit në Pejë së bashku me koordinim me prokurorin e shtetit.

Lajmin e ka konfirmuar për Arbresh.info, kryeprokurori i Pejës, Agim Kurmehaj.

“Po mund të ju konfirmoj se është duke u zhvilluar aksioni, por detaje tjera do të bëhen publike më vonë”, tha ai./Arbresh.info/