Kryeministri i vendit, Albin Kurti ka marr pjesë në shënimin e 80-vjetorit të bibliotekës Kombëtare të Kosovës “Pjetër Bogdani”.

Me anë të një postimi në Facebook, Kurti tha se Biblioteka Kombëtare është një monument i fjalës së shkruar, transmeton Arbresh.info.

“Rastësitë gjithsaherë janë të bukura, por kjo e sotmja që na ndërthuri me pasionin për librin dhe dijen ishte edhe më e veçantë. Pas Shtimes ku përuruam Bibliotekën e re të Qytetit, në Prishtinë shënuam 80-vjetorin e Bibliotekës Kombëtare të Kosovës “Pjetër Bogdani””, tha Kurti.

“Një udhëtim i gjatë në kohë, mes sfidash për ta ruajtur dijen dhe kujtesën tonë kolektive e historike, për atë që ka qenë dhe mbetet e nuk harrohet, dhe atë që e krijojmë gjersa kultivojmë frytet e saj në të tashmen e për të ardhmen”, shkroi kreu i ekzekutivit kosovar.

“Biblioteka Kombëtare e Kosovës është një monument i fjalës së shkruar. Në këto mure jetojnë idetë, zërat dhe ëndrrat e brezave që kanë ndërtuar identitetin tonë si popull. Andaj, teksa festojmë këtë përvjetor, le të përkushtohemi që të vazhdojmë ta forcojmë rolin e saj si një shtëpi të dijes dhe një dritë udhëheqëse për të ardhmen”, u shpreh Kurti./Arbresh.info