Kryetari i Odës Ekonomike të Kosovës, Berat Rukiqi, përmes një postimi në Facebook ka reaguar rreth mundësisë së shpalljes së gjendjes së jashtëzakonshme, duke thënë se mbyllja e bizneseve na dërgon në kataklizëm ekonomik.

Sipas tij këto masa nuk duhet të merren në kurriz të ekonomisë.

“Çdo gjendje e jashtëzakonshme që përfshinë mbyllje të bizneseve do të jetë fatale për ekonominë. Nëse gjendja e jashtëzakonshme shpallet për të mundësuar masa më të rrepta në luftën me pandeminë, atëherë këto masa të mos ndërmerren në kurriz të ekonomisë në tërësinë e vet. Masat duhet të ndërmerren ndaj atyre bizneseve që nuk respektojnë rregullat dhe masat parandaluese”, ka shkruar Rukiqi.

Sipas tij duhet të vendoset moratorium në çdo obligim që bizneset kanë ndaj palëve të treta.

“Çdo dekret/ligj për gjendjen e jashtëzakonshme duhet të përfshijë zbatimin obligativ të dispozitave të forcës madhore në marrëdhëniet kontraktuale në raportet e biznesit me bizneset e tjera, të biznesit me bankat, të biznesit me organet shtetërore”, ka shkruar Rukiqi.