Presidenti i Ukrainës, Volodymyr Zelensky, ka zhvilluar këtë të shtunë një bisedë telefonike me Presidentin amerikan, Donald Trump.

Lajmi është konfirmuar nga shefi i stafit të presidentit ukrainas, Andriy Yermak, përmes një postimi në Telegram, ku shkruan se “Zelensky është aktualisht në një bisedë telefonike me presidentin amerikan”.

Kjo telefonatë vjen pas një prej sulmeve më të rënda ajrore të ndërmarra nga Rusia kundër infrastrukturës energjetike të Ukrainës.

Detajet e bisedës nuk janë bërë publike, ndërsa nuk dihen ende temat që janë diskutuar mes dy liderëve.

Një ditë më parë, gjatë një konference për shtyp në Kiev, Zelensky i bëri thirrje Trump-it që të ushtrojë ndikimin e tij mbi presidentin rus, Vladimir Putin, për të ndalur sulmet ajrore ndaj Ukrainës.