Një tërmet me magnitudë 5.6 ka tronditur Egjiptin në orët e para të mëngjesit, duke shkaktuar alarm te banorët në disa zona të vendit. Lëkundjet u ndjenë pranë qytetit të Suezit, ndërsa autoritetet kanë nisur menjëherë vlerësimin e situatës dhe kanë aktivizuar masat emergjente.

Sipas Institutit Kombëtar të Kërkimeve për Astronomi dhe Gjeofizikë të Egjiptit, tërmeti u regjistrua pak pas orës 03:00, me epiqendër rreth 38 kilometra në veri të qytetit të Suezit.

Instituti bëri të ditur se deri më tani nuk janë raportuar viktima apo dëme materiale si pasojë e tërmetit.

Ndërkohë, Gjysmëhëna e Kuqe Egjiptiane ka aktivizuar planin e emergjencës në provincat ku janë ndjerë lëkundjet. Autoritetet u kanë bërë thirrje qytetarëve të qëndrojnë larg ndërtesave që shfaqin shenja dëmtimesh strukturore dhe të ndjekin vetëm informacionet zyrtare, ndërsa vazhdon vlerësimi i situatës.