Vlerësimi i fundit i inteligjencës nga Ministria e Mbrojtjes e Mbretërisë së Bashkuar thotë se Rusia në mënyrë të pabazë po vazhdon të akuzojë Ukrainën se synon të kryejë një sulm kimik ose biologjik.

Rusia, thotë buletini i Ministrisë së Mbrojtjes, “ndoshta mund të planifikojë të përdorë armë kimike ose biologjike në një operacion me flamur të rremë”, shkruan BBC, transmeton portal arbresh.info

Operacioni “mund” të marrë formën e një sulmi të dështuar, një zbulimi të organizuar të agjentëve ose municioneve ukrainase, ose dëshmi të fabrikuara të vendimmarrjes së supozuar të qeverisë ukrainase.

“Kjo me siguri do të shoqërohet me dezinformata të gjera për të komplikuar atribuimin”, thekson ministria përmes një postimi në Twitter.

Ndryshe operacionet e flamurit të rremë janë ato që kryhen me qëllimin për të maskuar palën përgjegjëse për sulmin – ose për të lejuar sulmuesin e vërtetë që të fajësojë një palë tjetër./arbresh.info/