Autoritetet italiane kanë hapur një hetim mbi mbytjen e jahtit “Bajezian”, në fillim të javës në ujërat e Sicilisë.

Në një konferencë shtypi, prokurorët deklaruan se aktualisht janë në fazat e para të hetimit, i pagëzuar “krimi hipotetik” për “mbytje të qëllimshme” të anijes dhe “vrasjes nga pakujdesia”.

Zyrtarët italianë theksuan se për momentin nuk kanë një person të caktuar që të jetë subjekt i procesit hetimor.

Autoritetet konfirmuan ndërkohë se trupi i fundit i gjetur ditën e premte ishte ai i 18-vjeçares Hana Linç, e bija e biznesmenit britanik të teknologjisë, Majk Linç.

Ato thanë gjithashtu se jahti ka gjasa të jetë mbytur nga një korrent i dhunshëm ajri. Thënë ndryshe, një erë e fuqishme që zbret nga një stuhi rrufesh dhe përhapet në mënyrë të paparashikueshme.

Nga 22 pasagjerët që ndodheshin në bord, 15 persona mbijetuan, përfshirë një fëmijë 1 vjeç, si dhe e ëma e Hana Linç, Anxhela Bejkërs.

Më herët gjatë javës, bazuar në rrëfimin e një dëshmitari, u spekulua se mjeti lundrues u mbyt nga një “grykë uji”, një lloj tornadoje që formohet mbi ujë.

Megjithatë, tani prokurorët besojnë se një ngjarje tjetër moti mund të ketë qenë shkaku dhe është pikërisht stuhia e rrufeve.

Këto të fundit janë të fuqishme, komplekse dhe turbulente, me ajër të grumbulluar brenda një reje që lëviz me shpejtësi në drejtime të ndryshme./euronews.al